АЛЫhАРДААХХА ДЬААҤЫ ФОЛЬКЛОРУН КҮНЭ

Быйылгы курдук миэтэрэнэн халыҥ хаардаах, күүстээх тыал типпит  Адыаччы-АлыҺардаах айанын суолун сотору-сотору  ИП Потапов Александр Гаврильевич Беларусь тыраахтарынан ыраастаан, көннөрөн иҺэриттэн,  айанньыттар көнө ньуурдаах суолунан  чааҺы кыайбат бириэмэнэн туруу үлэҺит дьоннордоох АлыҺардаах сиригэр тиийэн кэлэбит.

Сылаас эйгэ иҥпит кулууп дьиэтигэр  салайааччы Алаас Хотуна Зоя Гаврильевна Потапова Ийэ олоҥхоҺут Дарья Томская- Чаайка төрөөбүтэ 110 сылыгар уонна Дьааҥы фольклоругар  аналлаах тэрээҺин буолуохтаах сирин барытын бэлэмнээн көрүстэ. Күнүс 4 чаастан кулуупка АлыҺардаах учаастагын оскуола- саадын оҕолоро өҥнөөх харандаас, фломастер набора тутуурдаах иитээччилэрэ Мария Юрьевна Потапова, Екатерина Вячеславовна Рожина,  салайааччылара Дария Романовна Рехлясова арыалдьыттаах халыҥ хамаанданан кэлэн, (олоҥхо персонажтарын,  РФ Педагог уонна Наставник, улууска СомоҕолоҺуу сылларыгар даҕатан, Боруулаах олохтоох библиотекатын үлэҺитэ Слепцова Жанна  Матвеевна уруһуйдаата) олоҥхо персонажтардаах  уруһуйдары кырааскалаатылар. Оттон саамай үчүгэйдик кырааскалаабыт детсад иитиллээччитэ Ирена Потапова уонна оскуола оҕолоруттан Герман Слиж кыайыылаах тахсаннар минньигэс бириис туттулар, кыттыбыттар бары сонун кэмпиэт амсайдылар. Мустубут дьоҥҥо аан дойду, Россия  эпостарын уонна Дьааҥыбыт Ийэ олоҥхоһута Дарья Андреевна Томская-Чаайка  олоҕун, олоҥхотун быҺа тардан аудионан (Даарыйа-Чаайка олоҥхону толоруутун  аудиозапиҺын улуус култуураҕа саламтатын салайааччыта Владимир Артемьевич Мишуков биэрдэ) иҺитиннэрии уонна кинигэ быыстапкатын көрдөрүү буолла.

Бу кэнниттэн 1939-1940 сыллардаахха фольклору чинчийээччи  Андрей Андреевич Саввин хомуйбут матырыйаалларынан  тахсыбыт  «Верхоянские якуты: материалы Северной экспедиции А.А.Саввина (1939-1940г.г.)» кинигэттэн,  Адыаччылар  таабырыннарынан  *БРЕЙН-РИНГ* буолан ааста. Бу сытыы өйдөөхтөр, түргэн туттунуулаахтар оонньууларыгар  үс хамаанда: «СЫА-АРЫЫ АЛЛАР» -үүт мини-собуотун салайааччыта Потапова Вера Иннокентьевна дьүөгэлэринээн  Юмшанова Татьяна Ивановналыын, Горохова Ульяна Васильевналыын, «ПТИЦЕФАБРИКАЛАР» — АлыҺардаахха Москваттан тиийэ араас боруода куурусса, хаас сымыыттарын сакаастаан ылан инкубаторынан таҺааран кууруссаны, хааҺы үлүҺүйэн туран иитэр дьарыктаах Потапова Анна Васильевна кийиитэ, Потапова Александра Христофоровналыын, дьүөгэтэ  Потапова Елена Михайловналыын,  ОСКУОЛА-СААД дириэктэрэ Рехлясова Дария Романовна коллектибын үлэҺиттэрэ Потапова Мария Юрьевналыын, Рожина Екатерина Вячеславовналыын илин-кэлин түҺүстүлэр. Түмүккэ Брейн-ринг  муҥутуур  кыайыылааҕынан ОСКУОЛА-СААД  хамаандата тахсан, үөрүү өрөгөйүн билэн  «Верхоянский улус(район)» кинигэни бэлэх туттулар. 

Бу ыытыллыбыт Дьааҥы фольклоругар аналлаах тэрээҺини видеоҕа, хаартыскаҕа түөрт оҕолоох төрүт олохтоох эдэр ийэ Галина Ивановна Слепцова үйэлэргэ хаалар гына уҺулла, түҺэрдэ. УҺуллубут матырыйаал салгыы оройуоҥҥа буола турар библиомарафоҥҥа ыытыллан, таҥыллан,  сайын Верхоянскай куорат 385 сыллаах үбүлүөйдээх ыҺыаҕар түҺүлгэҕэ көрдөрүллүөхтээх. 

АлыҺардаахха анаммыт Олоҥхо, фольклор күнэ төрүт эйгэни кытта ситимнээх  Сахаэтнофитнес (ааптар республикаҕа аан маҥнай ыытыллыбыт Туйаарыма Куо-91 күрэх кыайыылааҕа, социокултуурунай проектировщик Ирина Владимировна Федорова)  хамсаныылаах дьарыгынан түмүктэннэ. Кулуупка кэлбит дьон  сурунаал, хаһыат кыбыныылаах дьиэлэригэр  тарҕастылар.

ТэрээҺиҥҥэ интэриэҺиргээн  сылдьыбыт, көрбүт, истибит, кыттыбыт, үгүҺү иҥэриммит,  үөрэ-көтө керсүбүт АлыҺардаах   ыалдьытымсах,  үлэни өрө туппут дьонугар  барҕа махтал буолуохтун! Тыа сирэ сайдыы суолунан иннин диэки эрэллээхтик хардыылаатын, сүөҺү-ас энчирээбэтин, үлэ-үөрэх үрдүккэ кынаттаатын, биир сомоҕо буолуҥ,  АлыҺардаах  үтүө үлэҺит дьоно!