КЭРЭНИ КЭРЭХСИИР АДЫАЧЧЫ КОЛЛЕКЦИОНЕРДАРА САҤА КИНИГЭ ТУЛА МУЬУННУЛАР

Быйылгы саас Дьааҥы коллекционердарыгар ураты умнуллубат түгэннээх буолла. Ол курдук,  Дьокуускайдааҕы «Көмүөл» издательскэй дьиэгэ 100 экземплярынан бэчээттэнэн тахсыбыт  *»Дьааҥылар коллекция абылаҥар»* диэн саҥа кинигэни улуус коллекционердарын түмсүүтүн салайааччы Тапталлана Васильевна Слепцова уонна Табалаах нэҺилиэгин  коллекционера  иилээн-саҕалаан, нэҺилиэктэртэн матырыйааллары хомуйан, тумэн кинигэ күн сирин көрдө. Оттон Адыаччыга бу күн ураты буолла. Арчы дьиэтигэр тэрээҺини сэргээччилэр кинигэни сүрэхтээтилэр уонна  олохтоох  коллекционердар бэйэлэрин муспут саамай күндү малларын аҕалан быыстапкалаатылар. КиҺи хараҕын үөрдэр бэрт интэриэҺинэй быыстапкаҕа «Алгыс» аҕам саастаахтар түмсүүлэрин салайааччыта, элбэх сиэн эйэҕэс эбээтэ Елена Петровна Потапова дьикти дьарыкка сиэннэрин көҕүлүүрэ бар дьоҥҥо

холобур. Кини сиэнэ Миленалыын таас статуэткалары, сувенирдары уонна сиэнэ кыыс Алеандра коллекциятын  киндер-сюрприз оонньууларын  туруордулар. «Кэскил» оҕо сайдар киинин иитээччитэ Наталья Петровна Юмшанова оҕолоругар кэрэни кэрэхсииргэ бэйэтин үтүө холобурунан уҺуйара быыстапка көстүүтүн уонна суолтатын ордук тупсарда. Кини ыт сувенирдары, кыра халандаардары, 2-с  кылааска үөрэнэр уола Ян гоночнай массыыналары, уруучуканы, оттон детсад саастаах  кыыҺа Василина пони аттары,  открытка арааҺын (40-чэ устуука мунньуллубут) коллекциялаабыттарын көрдөрүүгэ туруордулар. Оскуола социальнай педагога Любовь Владимировна Корнилова  быыстапкаҕа анал альбомҥа дьаарыстанан угуллубут кыра халандаардарын  сыа-сым курдук тутан аҕалан көрдөрдө. Бу халандаардаах альбому көрө олорон хас сыллаахха кимнээх быыбарга турбуттара, сылларынан знактар уонна да араас дьэрэкээн ойуулара ааҺан иҺэр сыллар остуоруйаларын чахчылара эбит. Олохтоох бибилэтиэкэр Любовь Контваровна Горохова чымадаан  иҺигэр темаларынан дьаарыстаммыт суруктаах уруучукалара бэрт сиэдэрэйдик көҺүннэ. Оттон Адыаччыга балаҕан-музей иҺигэр толору саамай баай коллекциялаах эдьиийдии быраат,  Дария Дмитриевна Слепцова мустубут дьоҥҥо былыргы алфавитынан  бэчээттэммит Н.Островскай «Ыстаал хайдах хатарыллыбыта» (1939 с.т.) уонна М.Шолохов «Тиэриллибит кырыс» (1940с.т.) кинигэлэри, оттон Лаврентий Дмитриевич Потапов хары чаҺыларын уонна  суотабай төлөпүөн арааҺын (билиҥҥи сыананан быҺа холуйан 200 тыҺ. солк. сууммалаах эбит диэн  көрөөччүлэр аахтылар) көрдөрүүгэ туруоран быыстапка силигин ситэрэн-хоторон биэрдилэр.

Олохтоох бибилэтиэкэр Горохова Л.К. саҥа кинигэ ис-тас тутулун, кинигэ тахсыытыгар быҺаччы  үлэлэспит дьону В.С.Рожин уонна Т.В.Слепцова туҺунан, кинигэҕэ кимнээх ахтыылара киирбитин кылгастык билиҺиннэрдэ. Итиэннэ  үөрүүлээх быҺыыга-майгыга коллекционердарга кинигэлэри туттартаата. ТэрээҺин хаартыскаҕа түҺэн үйэтитиинэн түмүктэннэ. Кэлбит дьон барыта кэрэни кэрэхсээн,  астынан-дуоҺуйан, үөрэн-көтөн тарҕастылар.

Кинигэ матырыйаала хомуллан, бэчээттэнэн тахсыытыгар быҺаччы үлэлэспит дьоҥҥо, чуолаан Дьааҥы коллекционердарын түмсүүтүн салайааччыта Тапталлана Васильевна Слепцоваҕа Адыаччы коллекционердарын аатыттан махталбытын тиэрдэбит